Пешниҳоди раиси КШНГЗС ба мақомоти Тоҷикистон: “Агар 30 нафар аз зиндониёни сиёсиро озод кунед, дар манотиқи дурдаст 15 мактаб ва 15 бунгоҳи тиббӣ хоҳам сохт”

Абдусаттор Бобоев, раиси Кумитаи шаҳрвандии наҷоти гаравгонҳо ва зиндониёни сиёсии Тоҷикистон (КШНГЗС) ва узви Шӯрои ПМТ, аз мақомот хост, зиндониёни сиёсиро озод кунанд ва ӯ дар муқобил, дар манотиқи дурдасти кишвар, 15 мактаб ва 15 бунгоҳи тиббӣ бино хоҳад кард.

Вай, дар номае саркушода ба дастгоҳи раисиҷумҳур ва мақомоти марбутаи Тоҷикистон навишт: “Аз Шумо эҳтиромона дархост мекунам, ки агар 30 нафар аз зиндониёни сиёсии Тоҷикистонро аз маҳбасҳо озод кунед, дар ивази он, дар деҳаҳои дурдасти кишвар, ки ба мактаб ва ё бунгоҳҳои тиббӣ ниёз доранд, 15 мактаби замонавӣ ва 15 бунгоҳи тиббӣ сохта медиҳам.”

Бобоев дар идома афзуд: “Нақша, лоиҳаҳо ва нархномаи иншоотҳоро омода карда ба Вазорати Илм ва Маорифи Тоҷикистон ва Вазорати тандурустӣ пешниҳод менамоям.”